- La vivo en la kelo -

Krei la plej bonan vinon estas arto, kiu postulas kompetentecon kaj altan tradicion.

Ankaŭ tie regas la respekto, la priatento de la vivanteco, kaj la delikateco.

Por fari la plej bonan el la Alzacaj vinoj, ni devas unue obteni la plej bonajn el la vinberoj. Ĉiuj prizorgoj donitaj al la vitoj, en ĉiuj momentoj de la jaro, sam-maniere daŭriĝos en la kelo.

La vinberoj estas rikoltitaj mane, en la taŭga momento, laŭ la maturiĝo de ĉiu terpeco kaj delikate transportitaj ĝis la elpremilejo. Ni elpremas niajn vinberojn kiel eble plej delikate, lasante malrapide elguti la sukon en akcepto-kuvon. Tiam ni uzas la tempon, la tutan tempon necesan por eltiri la plej bonan sukon.

Pli poste, post nokto da ripozo, la suko, kiu tute nature iĝis pli hela, estas apartigita de la plej maldelikataj partoj: la ŝlimoj. La vinbera suko estas poste metita en ligno-barelegojn aŭ en neoksideblajn kuvojn por la fermentado. Tiam, nenia selektita gisto, nenia aldonita substanco fremda al la vinberoj. Ni lasas la naturajn gistojn de la vinberoj komenci sian malrapidan laboron, laŭ propra ritmo por transformi la sukeron de la vinberoj. Poste, dum la sekvanta vintro, aliaj fermentadoj okazos kaj igos la vinon pli stabila. En tia malrapideco kaj en la respekto de la naturaj procedoj, la vino ellaboras sian tutan kompleksecon kaj donas ĉiu-jare la karakterojn tiom unikajn por ĉiu el la grundoj de nia bieno.

Kiam la vino estas preta, ni elektas la plej bonan momenton por la enboteligado. Ioma antaŭ-filtrado en printempo igas poste la vinon pli hela kaj brilanta. La blankaj vinoj estas enboteligitaj, en niaj keloj, antaŭ la nova rikolto en aŭgusto kaj septembro. Tiam ili ripozos ĝis kiam ni taksos ilin pretaj kaj indaj troviĝi sur via tablo.

Por la ruĝaj vinoj faritaj el pinot noir, la procedo estis pli komplika: fakte pinot noir estas vinspeco kun blanka suko, la koloro estas kaŝita en la haŭto de la vinbero. Por fari ruĝan vinon necesas do macerigi la haŭtojn de la vinberoj en ties suko dum la tuta daŭro de la fermentado. La solidaj partoj de la vinberoj bedaŭrinde emas flosi. Necesas do, regule profundigi tiujn partojn en la sukon, por ke estu kiel eble plej multaj kontaktoj. Matene kaj vespere, ni mane efektivigas tiun enprofundigadon, helpe de ilo kun longa tenilo ni enpuŝas en la sukon ĉiujn solidajn partojn. Post fermentado, la pinot noir estas elpremita kaj konservita en kverko-bareloj dum 6 ĝis 10 monatoj antaŭ la enboteligado. Laŭ la heleco de la natura vino, ni decidas ĝin iom filtri aŭ tute ne.

reveno